Պետական գույքի կառավարման կոմիտե
Հունիսի 20-ին Պետական գույքի կառավարման կոմիտեում կոմիտեի նախագահի տեղակալ Գեղամ Հովսեփյանի գլխավորությամբ տեղի է ունեցել «Վնասվածքաբանության և օրթոպեդիայի գիտական կենտրոն» ՓԲԸ-ի բաժնետերերի 2022 թ. տարեկան ժողովը։
Օրակարգում ընդգրկված հարցերը, որոնք վերաբերել են ընկերության 2022 թ. տարեկան հաշվետվության և հաշվապահական հաշվեկշռի, շահույթի և վնասի հաշվի, տարեկան շահութաբաժնի չափի, ինչպես նաև շահույթների և վնասների բաշխման հաստատմանը, ընդունվել են միաձայն։
Ընկերության գործունեության, առկա խնդիրների և զարգացման հնարավորությունների մասին խոսել է ընկերության տնօրենի ժամանակավոր պաշտոնակատար Թ. Նավիկյանը։ Վերջինս նշել է, որ ընկերությունը 2021-ին վերապրոֆիլավորվել է և հսկայական ծառայություններ մատուցել նաև COVID-19-ի ժամանակահատվածում։ Նախորդ տարում ընկերությունը նաև մատուցել է զորակոչային և նախազորակոչային տարիքի անձանց փորձաքննության և բժշկական օգնության մեծաթիվ ծառայություններ։
Տարեկան ժողովի ընթացքում որոշվել է, որ 2022 թ. ընկերության շահութաբաժնի 50 %-ը կվճարվի պետբյուջե, որը կազմում է շուրջ 3 մլն դրամ։ Ընկերությունում աուդիտ անցկացրած աուդիտորական կազմակերպության ներկայացուցիչները ընկերության աշխատանքները գնահատել են դրական։
«Վնասվածքաբանության և օրթոպեդիայի գիտական կենտրոն» ՓԲԸ-ն «Պետական գույքի մասնավորեցման 2017-2020 թվականների ծրագրի մասին» ՀՀ օրենքի ցանկում ընդգրկվել է 2017 թ. հուլիսից։ Ընկերության՝ պետությանը սեփականության իրավունքով պատկանող 100 տոկոս բաժնետոմսերի կառավարման լիազոր մարմինը Պետական գույքի կառավարման կոմիտեն է։
Նույն օրը Պետական գույքի կառավարման կոմիտեում տեղի է ունեցել նաև «Հանրապետական անձավաբուժական կենտրոն» ՓԲԸ-ի բաժնետերերի 2022 թ. տարեկան ժողովը միևնույն օրակարգային հարցերով։ Ընկերության տնօրենի ժամանակավոր պաշտոնակատար Գ. Հակոբյանը խոսել է ընկերությունում որոշակի խնդիրների, ոչ բավարար ռեսուրսների և այլ հարցերի մասին։ Ժողովի մասնակիցները գնահատել են անձավաբուժության կարևորությունը՝ նշելով, որ պետք է հնարավորինս քայլեր ձեռնարկել տվյալ ոլորտը զարգացնելու ուղղությամբ։
«Հանրապետական անձավաբուժական կենտրոն» ՓԲԸ-ն ևս ընդգրկված է «Պետական գույքի մասնավորեցման 2017-2020 թվականների ծրագրի մասին» ՀՀ օրենքի ցանկում:
