Պետական գույքի կառավարման կոմիտե
«2017 թվականն ամփոփել ենք աշխատանքային տպավորիչ արդյունքներով, ինչն առավել պարտավորեցնող է՝ այս տարի առավել արդյունավետությամբ աշխատելու համար: Մենք ունենք լուրջ ծրագրեր ու նախաձեռնություններ, որոնց առանցքում Պետական գույքի կառավարման եռամյա ծրագիրն է / 2018-2020թթ./ և անցումն էլեկտրոնային աճուրդներին: Տարվա գերակա խնդիրներն ու կառավարության գործունեության ծրագրից բխող միջոցառումները ևս ամենօրյա ջանքեր են պահանջելու մեզնից». այսօր հրավիրված խորհրդակցությանն ասել է Պետական գույքի կառավարման վարչության պետ Արման Սահակյանը: Կառույցի ղեկավարը փաստել է, որ արմատապես բարեփոխվում է պետական գույքի ծրագրային կառավարումը: Սկսած 2011թ.-ից, պետական գույքի կառավարումն իրականացվում է եռամյա ծրագրերի միջոցով, իսկ մեկնարկող 2018-2020թթ. եռամյա ծրագիրը ներառում է ոլորտում նախատեսվող բոլոր գործողությունները. ժամկետային առաջադրանքներն՝ ըստ տարիների, սպասվելիք ֆինանսական արդյունքներն ու պահանջվող ծախսերը, ակնկալվող հիմնական տնտեսական ցուցանիշները և այլն:
Վարչության պետը հիշեցրել է, որ պետական մասնակցությամբ առևտրային կազմակերպություններն, ըստ իրենց եռամյա ծրագրերի, պարտավոր են 2018թ.-ից սկսած, յուրաքանչյուր եռամսյակ Վարչություն տեղեկատվություն ներկայացնել առաջադրանքների կատարման վերաբերյալ, ինչին խստագույնս պետք է հետամուտ լինեն պատասխանատուները և տվյալների ընթացիկ դիտարկմամբ ու վերլուծությամբ հստակ պատկեր ունենան յուրաքանչյուրի վերաբերյալ: Առաջարկվող բարեփոխումները հնարավորություն կընձեռեն ծրագրերի նկատմամբ պատշաճ հսկողություն սահմանել և տեղ գտած թերությունները ժամանակին վեր հանել:
Վարչությունում սկսվել են նաև էլեկտրոնային աճուրդների համակարգի ներդրման աշխատանքները, որոնց շնորհիվ պետական գույքի վաճառքի գործընթացը կդառնա առավել թափանցիկ ու հրապարակային, կվերանան վարչական քաշքշուկները, և յուրաքանչյուր անձ էլեկտրոնային կապի միջոցով կկարողանա մասնակցել աճուրդներին:
Վարչությունում աշխատանքներ են տարվում նաև պետական գույքի հաշվառման համակարգը արդիականացնելու ուղղությամբ: Նախատեսվում է հաշվառման փաստաթղթային համակարգից անցում կատարել էլեկտրոնային ինտեգրացված համակարգին, որը հնարավորություն կընձեռի տարբեր մարմիններին՝ մուտք գործել համակարգ, փոխանցել և ստանալ անհրաժեշտ տեղեկատվություն: Օրինակ, լուսանկարներ, տեսանյութեր և այլն:
Վարչության ստորաբաժանումների պատասխանատուները ներկայացրել են մեկնարկած աշխատանքային մյուս ծրագրերի ընթացքը, խոսել առաջիկա անելիքների մասին: Անդրադարձ է եղել նաև Մասնավորեցման ծրագրին, ընկերությունների գնահատման ու մասնավորեցման նախապատրաստման, ինչպես նաև լուծարման, աճուրդային վաճառքի գործընթացներին: Մասնավորապես արձանագրվել է, որ աճուրդների առավել հրապարակայնացման շնորհիվ անցյալ տարի հաջողվել է աննախադեպ մրցակցային պայմաններում անցկացնել դրանք, ինչի արդյունքում ունեցել ենք վաճառքի՝ միջինում առնվազն մեկնարկային գնով արդյունքներ:
Վարչության պետ Արման Սահակյանը հանձնարարել է այսուհետ էլ հետամուտ լինել կարգապահությանն ու միաժամանակ առաջնորդվել աշխատանքի արդյունավետության բարձրացման սկզբունքներով: